CanwioHywel

Dydw i ddim wedi bo dyn cofnodi teithiau'n gydwybodol eto. Gan weithio'n ôl:

Dydd Llun 24 Mawrth: es gydag Euros ar Afon Lligwy, o dan Bont Gyfyng i lawr tan ar ôl rapid y Goedwig. Roedd y dwr yn weddol isel, a'r rapid olaf yna llawer yn haws nag oeddwn i'n ei gofio - neu ei fod yn fwy anodd o lawer pan fo lefel y dwr yn uwch. Cwta awr gymrodd y daith.

Dydd Sul 23 Mawrth: es gyda Mei ac Euros i Dryweryn. Dyma'r tro cyntaf i'r ddau ohonynt fod ar yr afon. Roeddent yn gollwng 10cumec. Cawsom un daith lwyddiannus i lawr at heibio i bont yr NRA - neb yn gorfod rolio er iddynt ddod yn agos at wneud wrth bont Mrs Davies. Ar yr ail daith i lawr, ceisiom ni fentro ychydig yn fwy. Methais i dorri allan ar ben y tro uchwben y Fynwent ond cywirais fy hun a mynd yr holl ffordd i alwr. Yn anffodus, methodd Mei a nofiodd, gan dderbyn sawl drawiad ar ei goesau. Rhoddodd y gorau a rhedodd gyda ei raff taflu i amddiffyn fi ac Euros hyd at y diwedd.

Dydd Sadwrn 15 Mawrth: es gyda Mei, Euros, Matt a Phil D ar Afon Afan. Gwaetha'r modd, roedd lefel y dwr gryn dipyn yn is na'r tro o'r blaen ac fe garfon ein ffordd i lawr braidd. Nofiodd Euros unwaith ar y darn rhwng y ddwy bibell.

Dydd Sadwrn 8 Mawrth (os cofiaf yn iawn): es gyda Mei, Euros, John C a John O'C ar Afon Wysg, o Dal-y-bont i Grughywel. Roedd y dwr yn eithaf uchel. Nofiodd John O'C ar raeadr y Felin (oedd yn ei ganw agored chwaraeus newydd), a bu bron iddo wneud ond ei fod wedi llwyddo dringo i'r lan wrth Spuller's Folly.

Ac yn yr wythnosau cyn hynny, gwnaethom un daith arall ar Afon Wysg, o Dal-y-bont i Langynidr (gyda John C a Rob rwy'n credu) a chwpl o ymweliadau â Rest Bay: un ar y Dydd ASadwrn pan oedd Cymru'n chwarae (yr Eidal?) yn y prynhawn. Paul Mac oedd wedi gwahodd aelodau'r Clwb i gwrdd yno tua 10.30, pan oedd y llanw newydd droi ar drai. Twp: yn lle cael tonnau gweddol, cawsom nhw'n mwynd yn wannach ac yn wannach. Yr wythnos gynt, pan es gyda Mei, Euros a John yn unig, cawson rai gwell o lawer.

hyfforddwr at 3:53:51 PM MDT Permalink | Blog about this entry |  Add to del.icio.us |  digg this This entry has 0 comments: Add your own

Ces lifft gydag Alan S. a Haydn. Gadael Caerdydd tua 7.50 a chwrdd a'r lleill yn Newbridge, Dartmoor am 09.45. Yno yn disgwyl amdanom oedd Matt, Phil D., Adam, a rhai newydd i mi, sef Del, Nathan a Tom. Ar ôl mynd ar y dwr, a gweld Tom yn gorfod rolio dwywiath o fewn dau ganllath, fe ymrannom yn ddau grwp: fi, Matt, Phil, Alan a Haydn yn un. Roedd lefel y dwr yn isel, troedfedd o dan y silff garreg yn Newbridge a golygai hynny bod yr afon yn garregog iawn. Mae'r afon yn wych a'r daith yn gyffrous bron o'r dechrau. Ran amlaf cadw i'r chwith o'r ynysoedd sy yn rhoi'r llwybr gorau - heblaw wrth Raeadr Euthanasia lle mae eisiau bod ar y dde i'w redeg. Dyna'r unig ddarn gariais o gwmpas. Gan fod pawb wedi stopio i'w archwilio, doedd gen i mo'r hyder i'w redeg er mewn gwirionedd doedd e ddim yn edrych yn berygl - dim ond fod rhuthr y dwr ychydig yn fwy, a lwc yn hytrach na sgil, yn cael y rhan fwyaf i lawr yn ddibroblem. Y flwyddyn nesaf i mi efallai. Gorffennom tua 2.30 ac roeddwn yn ol gartref erbyn 17.45.

hyfforddwr at 3:53:25 PM MST Permalink | Blog about this entry |  Add to del.icio.us |  digg this This entry has 0 comments: Add your own

Yng nghwmni Eurion, Adrian, Jim, a , hyd at Cold Knap, Neal. Cychwynnon tua 09.30 - hanner awr cyn penllanw - a throi i mewn i wynt G4 wnaeth hi'n dipyn o frwydr at Cold Knap lle gadawodd Neal, ac wedyn hyd at Aberthawan lle stopion ni am ginio.

Gostegodd y gwynt wedyn, lllonyddodd y mor, a bu'n llawer yn fwy cyfforddus ac yn haws. Yn Sain Dunwyd, roedd yr heddlu: yn disgwyl llwytho corff i ambiwlans. Roedd bad achub Coleg yr Iwerydd wedi dod o hyd iddo ar draeth: rhywun wedyn neidio oddi ar y clogwyni tebyg. Cyrhaeddon Sain Dunwyd tua 14.30 os cofiaf yn iawn. Mae mwy o fanylion am y daith wedi eu blogio gan Eurion: http://beyond-the-break.blogspot.com/

hyfforddwr at 3:25:54 PM MST Permalink | Blog about this entry |  Add to del.icio.us |  digg this This entry has 0 comments: Add your own

Es gyda John C a Rob. Roedd lefel y dwr yn weddol isel. Talon ni sylw arbennig i leoliad y ddwy bibell sy'n croesi'r holl ffordd ar draws yr afon. Mae'r un gyntaf yn dod yn fuan ar ôl i bibell ymddangos ar yr ochr dde yn rhedeg ar hyd lan yr afon ac yn y pen mae rhyw floc o adeilad. Y diwrnod hwn roedd yr afon yn dechrau rhannu'n ddwy o gwmpas ynys, neu o leiaf darn dwr bas iawn. Wrth syllu i lawr yr ochr chwith roedd sbwriel i'w weld. Rwy'n meddwl bod hynny'n gyffredin gan fy mod yn cofio sylwi arno o'r blaen. Mae'n digwydd oherwydd bod y sbwriel yn cael ei ddal yn erbyn y bibell. Ar ôl cario o gwmpas ar yr ochr chwith a rhoi yn ôl i mewn, cyn bo hir iawn mae tamaid o ddwr Gradd 3 ac yn weddol fuan wedyn mae cae pel-droed i'w weld ar yr ochr dde c mae'r cored/pibell nesaf yn ymddangos. Heblaw am y rhwystrau hynny, a allai fod yn beryglus iawn pe bai'r dwr yn uchel, mae'r gweddill y daith i lawr, o ran iaf Afon Corrwg i Bont-rhyd-y-fen yn hyfryd. Yn ben ar y cyfan, cafodd Rob rodd o sgidiau blaen caled gan y dyn oedd yn byw yn y ty y parciodd Rob o'i flaen. Cawl wedyn yng Nghanolfan Beicio Mynydd Glyncorrwg ac ychydig o sgowtio am le i roi i mewn yn ei ymyl. (Mae lle: wrth bont heibio i'r pyllau pysgota. wn i ddim sut croeso fyddai ar gael gan bysgotwyr y pyllau).

hyfforddwr at 3:20:36 PM MST Permalink | Blog about this entry |  Add to del.icio.us |  digg this This entry has 0 comments: Add your own

Yng nghwmni Eurion, Neal, Chris a Jim, cychwynnom o Lanilltud am 13.00 (roedd penllanw o gwmpas 12.15-12.30) trwy'r syrff (heb wlychu) gan fwriadu mynd i Southerndown. Roedd y môr yn lled lonydd, a bron dim gwynt (er gwaetha'r rhagolygon am F4-5) ond bod syrff a phan gyrhaeddom Southerndown roedd y tonnau'n dal i dorri ar y cerrig a'r traeth tywod ddim i'w weld - a'r tonnau'n fawr. Newidiom ein cynlluniau felly a bwrw ymlaen am Aberogwr lle daethom o hyd i ffordd trwy'r syrff lan i aber yr afon a glanio am 15.00. Erbyn diwedd y dydd roedd hyd yn oed machlud i'w weld dros Loegr. Roedd yn 17.00 arnom yn cyrraedd yn ôl yn Llanilltud.

hyfforddwr at 2:31:10 PM MST Permalink | Blog about this entry |  Add to del.icio.us |  digg this This entry has 0 comments: Add your own

Heb gofndoi nifer o deithiau, er bod manylion cwpl ohoynt ar flog Padlwyr y Ddraig. 1 Rhagfyr, Afon Wysg, Pontsenni- Aberbrân. 6ed: Afon Taf, rhan uchaf. Rhagfyr 16, Afon Wysg, Tal-y-bont i Langynidr, 24 Rhagfyr, rhan uchaf afon Taf, a heddiw, 29 Rhagfyr: Afon Gwy o Ddernol i Raeadr Gwy. 1.17m ar y mesurydd yn Rhaeadr am 06.00. oedd yn golygu ei bod yn llawn. Es yng nghwmni Euros, Owain, John C, Matt, Dave C,. John O', Mark ac Adam. Nofias ar y diwedd ar ôl fynd dros y rhaeadr ei hun i mewn i stoper mawr. Llwyddodd E rolioa r afon am y tro cyntaf, ddwywaith.

hyfforddwr at 12:59:47 PM MST Permalink | Blog about this entry |  Add to del.icio.us |  digg this This entry has 0 comments: Add your own

Rwy wedi esgeulo'r blog yma eto. Yn ystod y mis diwethaf rwy wedi bod i Symonds Yat ddwywaith, unwaith gydag Euros, ac unwaith gyda fe a'i ffrind Steff. Heddiw, gan nad oedd wedi bwrw glaw go iawn ers wythnosau a'r afonydd yn wag o'r herwydd, reodd wn wedi trefnu cwrdd â John C. ger cored Abercynon er mwyn chwarae yno, ond, dros nos, bu yn bwrw, a pahna gyrhaeddom Abercynon, gwelon fod digon o ddwr yn yr afon. Yn lle aros yno, aeothom lan at Fynwent y Crynwyr, a gwnued y daeith fer i lawr i Abercynon. Aethom dors y gored gyntaf am y tro cyntaf ers oesoedd, gan fod digon o ddwr i ni fydn ar yr ochr dde eithafol. Barf bod yn ôl yn ceufadio. Dylwn gofnodi fod Euros (yr unig un arall oedd gyda ni) wedi nofio tua'r dechrau. Anffodus, oherywdd roedd yn gwneud yn well na fi ar y don gyntaf. Erbyn i ni gyrraedd cored Abercynon, roedd yn dangos 7 ar y mesurydd, a'r tafod o ddwr wedi mynd.

hyfforddwr at 4:00:37 PM MST Permalink | Blog about this entry |  Add to del.icio.us |  digg this This entry has 0 comments: Add your own

Cwrddais ag Eurion, Neal, Richard U&U ac Adrian ym Mhenarth acaethom ar y dwr am 09.30, a llanw neap isel i fod am 11.30. Roedd gwynt ysgafn F2 o'r dwyrain a rhagolygon m F2-3, 4 yn achlysurol. Aethon mâs i oleudy Monkstone cyn syumd tuag Ynys Echni gyda'r llanw a chyrraedd yno ychydig cyn 11.30. Cawsom ginio ar y traeth nesaf at y lanfa ar ddwyrain yr ynys. Daeth y warden i ddweud y costiai £3.50 pe baem am grwydro ar yr ynys. Ar ôl cinio, tua 12.00 aethom gyda'r cloc o gwmpas yr ynys a chael y llanw'n barod yn llifo'n eitha cryf yn ein herbyn. Ferry glide wedyn tuag at drwyn Larnog a chyrraedd Penarth tau 14.00.

hyfforddwr at 3:48:22 PM MDT Permalink | Blog about this entry |  Add to del.icio.us |  digg this This entry has 0 comments: Add your own

Es gyda Rob G ac Emlyn i "gymanfa" môr gogledd Dyfnaint. Cyrhaeddom y gwersyll yn Mullacott Cross, y tu allan i Ilfracombe, ar nos Wener tra oedd hi'n olau o hyd, o gwmpas 20.00. Cwrddodd pawb am 9.00 y bore wedyn a rhannu'n grwpiau. Aethom i Lynmouth, yn rhan o grwp o 14 (er mai 15 adroddodd y rhai a gymrodd arnynt fod yn arweinwyr i ni i wylwyr y glannau yn Abertawe). Roedd yn fore arbennig o braf, prin awel o gwbl a'r môr fel gwydr. Cychwynnom tuag at Combe Martin tua chanol dydd. Ar ôl stopio am ginio ar draeth Ramsev (er bod yr "arweinwyr" yn mynnu ein bod yn Woody Bay) fe ymrannom yn ddau grwp o 7. Dychwelodd un grwp yn ôl tra aethom gyda'r grwp arall ymlaen i Combe Martin. Cyrhaeddom tua 16.00. Er ein bod wedi mynd yn erbyn dechrau'r llanw am o gwmpas awr, roedd y llanw'n isel iawn o hyd pan gyrhaeddom oedd yn golygu ffordd bell i gario'r cychod at y maes parcio. Ces lifft yn ôl i Lynmouth gyda John Cr., Gwyddel, ond roedd yn tynnu at ddwy awr erbyn i mi ddychwelyd a llwytho'r cychod i fynd o 'na.

Trefnodd Rob, Sea Kayaking SouthWest, y barbiciw gyda'r nos.

Roedd mymryn fwy o drefn arnom erbyn y Dydd Sul. Gwaetha'r modd roedd rhagolygon y tywydd yn anffafrïol iawn - ffors 3-7 o'r de-orllewin yn troi'n 3-4 o'r gogledd-orllewin wedyn. Er bod 11 wedi mynd gyda ni i draeth Hele, i'r dwyrain o Ilfracombe, dim ond 10 fentrodd i'r dwr. Trodd cwpl yn ôl wedi cyrraedd cei Ilfracombe. Gweithredais ychydg fel arweinydd er cymryd y lle olaf wrth i ni gychwyn i'r gorllewin am Fae Lee. Wedi cwrdd â dau badlwr lleol yn dod yn ôl o'r cyfeiriad hwnnw, penderfynom yn raddol na fydd yn mynd llawer ymhellach na dau fae arall. Stopiom am ginio ar draeth Brandy Cove ac wedyn aethom yn ôl gan "neidio'r creigiau" (rock hopping?). Cawsom un "digwyddiad" pan aeth John Cr. o'i gwch. Angorais i ei gwch tra rhoddodd un arall  - Toz - ef yn ôl i'w gwch. Roeddem wedi cychwyn y daith tua 10.45, rhyw awr ar ôl penllanw, ac roedd y llanw yn ein erbyn ar y ffordd yn ôl, er nad oedd unrhyw gryfder iddo gan ein bod yn agos at y lan. Ychydig o ymarfer rolio ar y diwedd ac roeddem allan o'r dwr tua14.00.

hyfforddwr at 4:34:43 PM MDT Permalink | Blog about this entry |  Add to del.icio.us |  digg this This entry has 0 comments: Add your own

Rwyf wedi bod yn ddistaw ers blwyddyn. Y rheswm am hynny oedd fy mod wedi gorfod rhoi'r gorau i geufadio oherwydd problem gyda f'ysgwydd. Ar ôl ymweld ag Uist, es at arbenigwr i ofyn ei farn: roedd gen i "ardrawiad" ysgwydd ac ar ben hynny roedd yr ysgwydd wedi rhewi, ac roedd gen i ddau benelin tennis. Erbyn hyn yn ffodus, rwyf llawer yn well ac wedi ail-gydio mewn ceufadio. Yn ystod y ddau neu dri mis diwedd rwyf wedi adeiladu i fyny'n araf:

cwpl o droeon bach ger Ynys Sili yng nghwmni Rob G.;

un tro mwy ar fy mhen fy hun, pan es o Swanbridge i bier Penarth ac yn ôl;

tro i Rest Bay gydag E. i syrffio;

tro arall ar fy mhen fy hun o Aberogwr allan i graig Tusker ac wedyn i gyfeiriad traeth Southerndown;

tro bach gydag E. ger Pont-rhydybont, i E. gael ymarfer rholio mewn dwr oedd yn symud, wedyn tro arall gydag e ar afon Menai o Bwll Fanogl i bont Britannia ac yn ôl;

ar nos Lun 20 Awst, es ar afon Taf yng nghwmni Padlwyr y Ddraig, o Fynwent y Crynwyr i Drefforest;

ac ar Ddydd Gwener 24 Awst, gwnes daith, ar fy mhen fy hun eto, o gwmpas 25km, o draeth Lligwy i Ynys Dulas, lle glaniais, cyn mynd o gwmpas Ynys Moelfre ac wedyn ymlaen i Benmon.

hyfforddwr at 3:14:12 PM MDT Permalink | Blog about this entry |  Add to del.icio.us |  digg this This entry has 0 comments: Add your own